A Flama

“Sabores próximos” regala esquerolas ecolochicas en A Flama

2012-01-18T03:31:00.000-08:00

O 1 d'agosto de 2011 plantemos as primers berzas en o Lugarico de Cerdán. Yera luna mingua, como recomiendan as tradicions d'ahiere y a biodinamica de hue. Bi habió de calor, demosquitos y, a la fin, plevia. Yera a primer acción productiva que hemos encetau: Gustos amanaus..."

Beluns remeraretz o prencipio d'a carta que espardiemos ta fer-nos conoixer, a on que explicabanos qui somos y quals son os nuestros obchetivos. T'a part d'alavez aprefeitemos a enchaquia ta amanar-nos más a tu, y una tardada de setiembre pretemos a regalar ensaladas a tot qui dentraba en a librería Cálamo.

Agora ya han pasau 4 meses, y continamos con a mesma ilusión y a mesma rasmia que en prencipiar. Por ixo, queremos continar amanando-nos a vusatros, queremos que descubratz (u redescubratz) os autenticos gustos d'o campo, o gusto d'as verduras de temporada, recient cullidas, y sin tractar con quimicos.

Por ixo, o chueves 19 de chinero de 18:30 a 22:00 seremos en A Flama Tabierna regalando esquerolas y explicando-ie a nuestra iniciativa a totz qui vaigatz ta iste bar.

Sabores Próximos S.L.

Somins entre boires

2012-01-03T23:19:00.000-08:00

O venient diya 6 de chinero se presenta en A Flama a exposición “Somnis entre boires” de Marc Martí, en colaboración con MagoFermin. En l’acto, a las 20.30, leyeré poesías de Marc en catalán y castellan, alcompanyau d’a suya guitarra.

“Somnis entre boires” ye una muestra de 21 fotografias de collas mosicals aragonesas en directo, que suposa una chicota anviesta d’a colección de l’autor. As imachens, feitas en conciertos de collas como Mallacán, Gen, Prau, Visión Túnel u Temps al Temps, quieren trasmitir a ideya de que bi’n ha un movimiento mosical dillá d’os espacios granizos y as grans ciudatz.

Marc Martí, naixiú de Massalió, ye licenciau en politicas y triballa en Ràdio Matarranya i Noticies del Matarranya. Como fotografo, ha publicau o suyo triballo en Heraldo d’Aragón, La Comarca, Diari de Tarragona u Temps de Franja y colabora con atros meyos dichitals. Amás, Marc Martí ye poeta y letrista de collas como Los Draps u Txirigol.

Visto en: http://www.purnas.com/2012/01/02/suenios-entre-boiras/#ixzz1iTJM1YL9

Exposición solidaria con Nadia Nerea

2011-12-14T06:38:00.000-08:00

Dende o 6 d'aviento y dica lo 6 de chiner, se puet visitar en A Flama a nueva exposición de cuadros y fotografías d'os artistas Roberto Roig, Fernando Ramillete, Vanessa Cañadas, Bolboreta Funky y V. Monahan.
Ista ye una exposición solidaria preba de replegar diners ta Nadia Nerea, una nina que le cal una operación. Ta colaborar con ista causa se pueden mercar as obras u participar, por nomás 5 euros, en o sorteu de dos cuadros de Roberto Roig.

Rufiertas y charradas en aragonés totz os martes

2011-12-13T06:54:00.000-08:00

Qui haigatz estau bella vegada en A Flama ya sabetz que siempre podetz trobar-ie chent que charre aragonés. Agora, antimás, totz os martes te puetz chuntar con atras personas que quieran practicar y conoixer ista polida luenga nuestra. Dende as 20 se prencipian as Rufiertas y charradas en aragonés. Tiengas o ran que tiengas bi serás bienveniu/da!!!

Ufierta d'agosto

2011-08-16T02:05:00.000-07:00

En A Flama aprofeitamos o verano ta pensar en nuevas recetas. Mientres tot lo mes d'agosto, puetz estar d'as primeras personas en tastar as nuestras nuevas virollas. Prencipiando por a nueva crepe de camparols y queso azul por nomas 4,50 euros. Antimás en o pre bi ye incluyida una bebida a esleixir entre canya de biera, suco u augua. ¿Qué mas le puetz demandar a lo verano?

A flama en o festival Esfendemos a tierra

2011-07-13T04:11:00.000-07:00

Dende A Flama hemos quiesto refirmar y colaborar con o festival Esfendemos a tierra. O pasau 7 de chulio se presentó o festival y a exposición "Artieda, historia y luita" que continará en A Flama tot o mes de chulio. Tamién se'n vende os viaches ta ir-ie en autobús. Ta tener toda a información sobre o festival y o viache pasa-te por o suyo blog: http://artieda2011.com/
Antimás, si bi vas podrás tastar os nuestros crepes y entropans, pues a nueit d'o sabado bi seremos fendo a cena. Mosica, buena virolla y muita luita! Tos i asperamos...

Presentación d'o Tamborilé y campionato de Morra

2011-05-24T01:07:00.000-07:00

O viernes, dende as 20.00, nos visitarán os organizadors d'o Festival de mosica de carrera Tamborile. Nos explicarán como ye iste festival que va por a suya tercer edición y dimpués chugaremos a la Morra, chuego muit estendillau por tot Teruel y, prou que sí, por Mezquita de Jarque, o lugar a on se fa o festival.
Mas información en: http://tamborilefestival.blogspot.com/

Concierto de Las Koras de Zarabene

2011-05-24T01:02:00.000-07:00

Iste chueves 26 a las 20.00 en A Flama podremos sentir a mosica de As Koras de Zarabene, gracias a l'asociación Zarabene. Si quiers más información visita: http://www.zarabene.blogspot.com/

I cabo d'anyo d'A Flama

2011-05-18T03:02:00.000-07:00

Ya fa una anyada que A Flama va ubrir as suyas puertas. Queremos celebrar-lo con tu, asinas que yes convidada u convidau, iste chueves 19 de mayo, dende as 20.00 a estar-te-ie con nusatras en una tardi-nueit muito especial

Exposición de Lurte en Mayo

2011-05-18T02:57:00.000-07:00

Os almugavars son plegaus en A Flama. Con a enchaquia d'o suyo nuevo disco, Neopatria, Lurte ha presto una exposición que durará tot lo mes de mayo. Más de diez fotos d'istos mosicos d'a companyia almugavar arribando en Neopatria ta conquerir-la con o suyo folk-metal. Fotos de Álvaro Villa.

Exposición "Oaxaca: Resistencia y represión"

2011-04-07T11:39:00.000-07:00

Hue se ferá a debantadera en A Flama d'a nueva exposición d'o mes d'Abril. O titol ye "Oaxaca: resistencia y represión" y bi habrá fotos sobre os movimientos socials d'ixa parti de Mexico y a represión que sufren.

Exposición de Mallacán en Chapón

2011-03-24T12:34:00.000-07:00

Aprofeita os zaguers diyas de marzo ta visitar a exposición sobre a chira que fació iste verano a colla de mosica en aragonés Mallacán. Fotos d'os suyos conciertos, d'os puestos a on que estioron, cartels, chambretas... Dica la fin de marzo en l'horario cutiano d'A Flama

Exposición fotografica de Rocío López

2011-01-25T01:35:00.000-08:00

Dende fa bells diyas y dica metat de febrer ya ye penchada en A Flama a nueva exposición fotografica de Rocío López. Cuerpos femeninos en coritatis en sobrebuenas fotos en color y blanco y negro. Viene-te-ne t'A Flama a viyer-la!

Cata de biera mudejar

2011-01-09T07:44:00.000-08:00

Iste chueves 13 de chinero, dende as 20.00, podretz tastar de baldes todas as variedatz de bieras mudejar que nos trayerán dende Gea d'Albarracín.

El loco samoano

2011-01-03T10:11:00.000-08:00

Ya tos podetz descargar o primer numer de "El Loco samoano" en o suyo blog ellocosamoano.blogspot.com, a on que participa, entre atros, Chema Cebolla. Iste autor tien un comic-exposición bilingüe aragonés-castellano en A Flama. Viene-te-ne a viyer-la y leye El loco samoano!

Tronca de nadal en A Flama

2010-12-17T02:06:00.001-08:00

Nueva carta

2010-12-13T03:09:00.000-08:00

A Flama continamos treballando por enamplar a nuestra ufierta de crêpes, birolla, batius, entropans, ... Por ixo, dende iste cabo de semana, hemos adhibiu un fascal de novedatz en a carta. Fetz-le una uellada y pasatz-tos-ie a tastar todas as novedatz.
¡Que faiga buen prebo!

Exposición comic de Chema Cebolla

2010-12-06T02:23:00.000-08:00

Mientres tot lo mes d'aviento, en A Flama puetz leyer o nuevo comic de Chema Cebolla. A historia, con as suyas versions en aragonés y castellano, mezcla pasions, crimens y intriga con una final sorprendent. No te lo puetz perder!

Wi-Fi y Canto a la libertad

2010-12-06T02:15:00.000-08:00

Dende fa bells diyas ya puetz conectar-te t'o mundo virtual dende A Flama. O nuevo rete wi-fi ye instalau y ya son muitos os clientz que la han feito servir. Viene-te-ne t'A Flama con o portatil tuyo y conecta-te!

A Flama tamién ye participando en a campanya de replega de firmas ta fer d'o Canto a la libertad o himno oficial d'Aragón. Ista Iniciativa Lechislativa Popular, cal que replegue 15.000 firmas ta que se pueda debatir en as Cortes d'Aragón y pueda aprebar-se. Tiens más información sobre a campanya en www.cantoalalibertad.org.

Luengas compartidas

2010-11-23T00:26:00.000-08:00

Luengas compartidas

Intercambeo de luengas

Queremos y creyemos que l'aprender una luenga puet estar qualcosa mas facil y divertiu si ye bella cosa compartida.

A cultura y o conoiximiento ye de todas as personas y todas disposamos d'ells. Entendemos que se pueden adquirir y compartir sin que bi haiga esquilmen economico de no dengún, pues todas tenemos qualcosa que alportar, bella cosa nueva que aprender y antimás ye posible fer-lo de traza solidaria. Por ixo, se creya y ubre a qualsiquier persona que le intrese ista iniciativa de Intercambeo de luengas.

Preba d'estar un punto de trobada que sirva a:

qui charra u conoix una luenga y puet aduyar en o suyo aprendizache.
Qui quier charrar y/u conoixer unatra luenga.
Qui tienga de materials u información sobre ella.
Qui siga mirando recursos t'aprender una luenga.
Qui le calga aduya ta fer chestions, escritos, traduccions, etc, en una luenga que no siga la suya.

Bi ha muitas posibilidatz. En contar con chent que se refirman unas a atrás, belunas d'as ideyas que se pueden desembolicar son:

Charradas.
Compartir materials.
Compartir conoiximientos.
Consellos y aduya en l'aprender.
Traducciones.
Aduya ta fer chestions.

Ta ixo, se facilita un “tablon d'anuncios”, un espacio fisico y unatro virtual a on que se comparta a información y sirva ta ista mena de trobadas. Os puntos fisicos se trobarán en o C.S.O. Kike Mur (Pza d'a Memoria, antiga garchola de Torrero) y en a Tabierna A Flama (Carrera Mayor 53, Vico d'a Madalena) y o virtual en lenguascomparticas.xxxxxx.com (encara por determinar).

Pero en iste espacio d'intercambeo i cullen muitas más posibilidatz, por ixo se facilita o correu lenguascompartidas@gmail.com ta que tot lo mundo que quiera alportar as suyas ideyas, lo faiga.

Iste domingo, socalce en A Flama

2010-11-16T00:00:00.000-08:00

Iste domingo 21 de noviembre, bi habrá un nuevo socalce con punchadiscos en A Flama. DJ Roka y DJ Moon Stomper meterán mosica dende o meyodiya. De vez que sona a mosica podrás fer-te bella crepe u tapa y prou que tastar as nuestras bieras, vermut u qualsiquier atra cosa que quieras. Un plan sobrebuneo ta lo maitin d'o domingo... Te i asperamos!

Exposición de noviembre en A Flama

2010-11-07T23:46:00.000-08:00

Ya ye penchada en as paretz d'A Flama a nueva exposición sobre Mexico de Marta Rivasés. Mientres tot lo mes de noviembre puetz visitar-la en o nuestro horario de 10 a 13 y de 18.00 a 0.00.

Fuera de los complejos hoteleros, de las rutas organizadas, de la pulsera "todo incluido", en Mexico se desarrolla una vida con escenas cotidianas como estas que presentan un Mexico diferente al habitual, con personas amables, trabajadoras y en condiciones muy diferentes a las de las portadas de los catálogos de viajes y a lo que nos intentan vender, esta exposición pretende ser una pequeña muestra, con sensibilidad y respeto de las personas y situaciones que se pueden encontrar si uno explora con un poco de profundidad el DF

Pilars en A Flama

2010-10-06T00:35:00.000-07:00

Istos Pilars A flama ubrirá dende as 12 d'o maitin ta ufrir-te socalces, chentas, brendas y cenas y muitas sorpresas... Pasa-te-ie!

Charringlish y bookcrossing

2010-09-12T04:33:00.000-07:00

Ista semana A flama tendrá dos actividatz ta tot qui quiera amanar-se-ie. A primer, o venient chueves 16 a las nueu d'a tardi, ye a debantadera d'un punto oficial de bookcrossing. Astí podretz compartir totz os libros que quieratz en qualsiquier luenga, encara que, prou que sí, tendremos una dedicación especial a l'aragonés. As promotoras d'ista iniciativa aprofeitarán ta explicar-nos o funcionamiento d'o book-crossing y resolver todas as dubdas que tiengatz.

O domigo 19 prencipia tamién una nueva actividat que continará mientres toda la anyada. Se diz Charringlish y será una colla de chent que s'achuntará quan decidan ta practicar o suyo anglés con patrimonials y no patrimonials d'ista luenga. I cullen todas as personas intresadas en practicar ista luenga, sía qual sía o suyo ran. A primer reunión será o domingo a las 20.00. Si yes intresada, pero no puetz ir ixe diya puetz escribir-nos decindo-nos a tuya disponibilidat y les ne diremos a os promotors d'ista actividat ta que i paren cuenta.

Socalce en A Flama

2010-09-07T00:16:00.000-07:00

O venient sabado 11 de Setiembre en A Flama (C/ Mayor, 53), dende as 13h y dica las 17h, a millor mosica negra (Soul, Ska, Reggae, R'n'b...) d´a man de Trojan Rudeboy/Groovy Grandpa/Scooterjerk.Bi habrá socalce (pinchos, biera, crêpes, racions y sucos...)

Tos i asperamos!

Novedatz en chulio

2010-07-30T09:09:00.000-07:00

Mientres o verano A flama contina enchegada. Ta contrimostrar-lo tos ufrimos bella novedatz. A primer d'ellas ye a nueva exposición de fotografías de Lucía López titulada "Trangos Urbans". Diez fotografías repolidas con imachens de ciudatz como Amsterdam, Zaragoza, Bruselas u Newcastle. Podetz visitar-la en o nuestro horario de 10 a 13 y de 18 dica la meyanueit.
Ta pasar fresquet o verano, que millor que una biereta. Dende iste lunes, ufrimos, de 18 a 20.30 botellins de 20cl. de Ambar a 1 euro y dos picheras de biera por 3,50 €. Tamién podetz aprofeitar ta chugar un poquet a belún d'os chuegos que tenemos: cartas, parchís, auca, achedrez, damas, ... Y si tenetz gana, podetz acompanyar a vuestra bebida con beluna d'as nuestras crepes u tamién con un gazpacho casero por nomás 2,50 €.

A carta

2010-06-15T00:58:00.000-07:00

Ya podetz consultar aquí a nuestra carta de crepes, gofres, sucos, batius y de tot lo que podetz minchar en A flama. Punchando en a imachen se fa más gran ta que la puedas leyer. Remeratz que si queretz guaraciar-tos un buen puesto ta cenar ye millor que nos gritetz ta reservar mesa. Más que más si ye cabo de semana u si sotz muitas personas. O telefono nuestro ye o 976391008

Baixo a uellada d'o sol

2010-05-24T13:35:00.000-07:00

“Baixo a uellada d'o sol” ye o titol d'a primer exposición se fa en A Flama. Más d'una decena de fotos de naturaleza feitas por tot lo país y dillá, amostrando animals, plantas y paisaches. L'autora, Lucía López, acompanya cada foto d'una chiqueta explicación d'o que i somos viyendo feita, prou que sí, en aragonés.
Como eixemplo tenetz una d'as fotos más t'abaixo. Pasa-te por A flama y bi podrás viyer a resta....

Títol: Cerollera Borde

Puesto: O Pueyo de Tena (Alto Galligo)

Calendata: Adviento 2009

Curiosidatz: Ista planta sobrevive gracias a la inestimable colaboración de paixaretz de toda mena que minchan os suyos fruitos, as cerollas, y que una vez finalizau o proceso dichestivo esparden as suyas simients. Ye curioso, que ista actividat que da vida a las cerolleras, le'n saca a os paxaros, pues os cazataires gosaban de fer servir as cerollas como cibo t'os animals, d'asti o suyo nombre en castellán Serbal de los Cazadores

A flama plega d'enchegar-se!

2010-05-18T00:05:00.000-07:00

A Flama ye un prochecto cooperativo que plega d'ubrir as suyas puertas. En ista tabierna podetz prebar os nuestros deliciosos crêpes dulces y salaus, gofres y uns sobrebuens sucos y batius de fruitas naturals, amás de café, infusions u as nuestras diferents bieras de gran calidat. Pero más que más ye un espacio ubierto a l'actividat social y cultural a traviés de charradas, exposicions, presentación de nuevos prochectos, y asinas asinas... un puesto que sirva de socialización en a luenga aragonesa y se torne en un espacio de trobada ta todas y totz.

A Flama plega d'enchegar-se!

A Flama es un proyecto cooperativo que acaba de abrir sus puertas. En esta taberna podéis probar nuestros deliciosos crêpes dulces y salados, gofres y unos riquísimos zumos y batidos de frutas naturales, además de café, infusiones o nuestras diferentes cervezas de gran calidad. Pero sobre todo es un espacio abierto a la actividad social y cultural a través de charlas, exposiciones, presentación de nuevos proyectos, etc... un lugar que sirva de socialización en lengua aragonesa y se convierta en un espacio de encuentro para todas y todos.

A Flama acaba de encenderse!